ဆောင်းပါး ဗညားဟံသာ
မြန်မာပြည်တွင် “အမျိုးသားရေး”ဆိုတဲ့ဝေါဟာရကို သာမန်ပြည်သူတွေ အလေးအနက် တွေးတောစဉ်းစားဆင်ခြင်ဖို့ အချိန် သိပ်မရှိခဲ့ဘူး။ ဒီစကားလုံးအောက်တွင် အာဏာရှင်စစ်အစိုးရက အကာအကွယ်ယူပြီး တိုင်းရေးပြည်ရေးကိစ္စမှန်သမျှကို ခြုံငုံဆောက်ရွက်လာခဲ့တယ်။ ကျွန်ုပ်တို့အသက်ရှင်နေတဲ့ခေတ်တွင် “အမျိုးသားရေး”ဆိုတဲ့ကိစ္စမှန်သမျှကို အာဏာရှင် အုပ်စုနှင့် လက်ပါးစေတစ်စုက အမျိုးသားရေးအကျိုးစီးပွားအပေါ် အပေါ်စီးခွယူပြီး နိုင်ငံရေး၊ စီးပွားရေး၊ ပညာရေးနှင့် လူမှုရေးကိစ္စအဝဝတွင် အမြတ်ယူကြတယ်။ အမျိုးသားရေး၏အဆင့်အတန်းနှင့်ပုံသဏ္ဍာန်တွေကို ကျွန်ုပ်တို့အလေးအနက် စဉ်းစားရန် တာဝန်ရှိသည်။ မြန်မာပြည်၏အမျိုးသားရေးအကျိုးစီးပွားကို လက်တွေ့ကျကျ ကျင့်သုံးဆောင်ရွက်ရန်အတွက် မြန်မာပြည်သားအားလုံးတွင် တာဝန်ရှိသည်။ အမျိုးသားရေးအကျိုးစီးပွားကို လက်တွေ့ကျကျ ပုံဖော်ဆောင်ရွက်နိုင် ရန်အတွက် ယနေ့ခေတ်ကာလတွင် ကျင့်သုံးနေသောမြန်မာပြည်၏နိုင်ငံရေးစနစ်ကို ကျွန်ုပ်တို့မြန်မာပြည်သားမှန်သမျှ ရဲရင့်စွာ၊ တာဝန်ရှိစွာနှင့် သဘောထားကြီးမားစွာ အဖြေရှာရန် လက်လှမ်းမှီသမျှ စမ်းသပ်ရေးသားရန် ကြိုးစားပါမည်။
အောက်တန်းကျတဲ့နိုင်ငံရေးအဆောက်အအုံဟာ မြန်မာပြည်၏အခြေခံပျော့ကွက်၊ အားနည်းချက်တွေဖြစ်တယ်။ တစ်ပါတီ စစ်အာဏာရှင်စနစ်၊ ဗမာ့အမျိုးသားဦးစီးယူပြီး ကျန်တဲ့အမျိုးသားတွေကို ဖိနှိပ်ချုပ်ချယ်တဲ့နိုင်ငံရေးစနစ်၊ လက်တွေ့မကျ နိုင်ငံရေးသဘောတရား မရင့်ကျက်တဲ့ပါလီမန်(ပြည်သူ့လွှတ်တော်စနစ်) စတဲ့အခြေခံနိုင်ငံရေးအဆောက်အအုံတွေဟာ ကျွန်ုပ်တို့မြန်မာပြည်ကို ဆုတ်ယုတ်အောက်တန်းကျစေတာ ဖြစ်တယ်။ ဒီအောက်တန်းကျတဲ့နိုင်ငံရေးအဆောက်အအုံတွေ မြို့ပေါ်မှာ ကြီးထွားပြီး အစိုးရယန္တရားတွေကို စစ်တပ်က အပေါ်စီးခွယူတာတွေနှင့် တိုင်းပြည်၏ပေါကြွယ်တဲ့ဓါတ်ဆီ၊ ဓါတ်ငွေ့၊ သစ်တော၊ ကျောက်စိမ်းနှင့် ပင်လယ်သားငါးတွေကို ပြည်ပနိုင်ငံတွေကို ဈေးပေါပေါ ရောင်းချပြီး စစ်တပ်ကြီး ထွားရေး၊ စစ်တပ်ခိုင်မာရေး၊ စစ်တပ်အာဏာတည်မြဲရေးအတွက် ဆက်လက်လုပ်ဆောင်နေခြင်းဟာ ကျွန်ုပ်တို့တိုင်းသူပြည် သားတွေ ပို၍ နစ်နာစေတာဖြစ်တယ်။ ဒီမှားယွင်းနေတဲ့နိုင်ငံရေးအဆောက်အအုံတွေ၊ လက်တွေ့မကျတဲ့အာဏာကျင့်သုံးမှု တွေ၊ တရားမမျှတတဲ့နိုင်ငံရေး၊ စီးပွားရေး အာဏာသုံးစွဲမှုတွေ စတဲ့ပြဿနာပေါင်းများစွာ ဖြစ်ထွန်းစေတဲ့ယနေ့ နအဖ ကိုင်တွယ်နေတဲ့အတိုင်းအတာတွေဟာ တရားလွန်နေပြီး။
ကျွန်ုပ်တို့မြန်မာပြည် အမျိုးသားအကျိုးစီးပွားဟာ စစ်တပ်(တပ်မတော်)၊ လူမှုအသိုင်းအဝိုင်းတွင် အရေးကြီးတဲ့စီးပွားရေး၊ ဘဏ္ဍာရေး၊ အတတ်ပညာထွန်းကားရေး၊ လူမှုဖုံလှုံရေးနှင့် တရားဥပဒေ(မှန်ကန်မျှတတဲ့တရားဥပဒေ) တိုးတက်လွှမ်းမိုးရေး တွေဟာ အရေးကြီးတဲ့ နိုင်ငံရေးသော့ချက်တွေ ဖြစ်တယ်။
ကျွန်ုပ်တို့အသက်ရှင်နေထိုင်သရွေ့ ဤမှားယွင်းသွေးယိုနေတဲ့၊ အောက်တန်းကျတဲ့နိုင်ငံရေးအဆောက်အအုံတွေကို တိုင်းသူပြည်သားတွေ လက်တွေ့ကျကျ မပြုပြင်လျှင် နိုင်ငံရေးရာဇဝတ်မှုတွေ စစ်အာဏာရှင်နအဖတွေ ဆက်လက်ကျူး လွန်နေမှာဖြစ်တယ်။ ယနေ့ခေတ်တွင် ကျွန်ုပ်တို့မြန်မာပြည်ဟာ အဆင့်အတန်းမရှိတဲ့တိုင်းပြည်၊ ပညာရေးနိမ့်ကျတဲ့တိုင်း ပြည်၊ အသိပညာ၊ အတတ်ပညာ မထွန်းကားတဲ့တိုင်းပြည်နှင့် ဘဏ္ဍာရေး၊ ငွေကြေးရေးရာတွင် တန်းမရှိတဲ့တိုင်းပြည် စတဲ့နာမည်တွေနဲ့ ပြည်ပနိုင်ငံတွင် နာမည်တင်စားလာတယ်။ ကျွန်ုပ်တို့လက်တွေ့ရင်ဆိုင်နေရတဲ့အမျိုးသားရေး ပြဿနာဟာ သွေးခွဲရေး၊ သွေးကွဲရေးမဟုတ်ပဲ အောက်တန်းကျတဲ့နိုင်ငံရေးအဆောက်အအုံကို ပြုပြင်ပြောင်းလဲဖို့ သဘောထားကြီးစွာ၊ နားလည်မှုပြည့်ဝစွာ တည်ဆောက်ဖို့ အရေးကြီးတယ်။
ကျွန်ုပ်တို့ခေတ်တွင် နိုင်ငံရေးအနိုင်အရှုံးမရှိတော့ပြီး။ တိုင်းပြည်တစ်ခုတွင် တိုင်းပြည်၏အမျိုးသားအကျိုးစီးပွားအတွက် အစိုးရမှခေါင်းဆောင်များ၊ စစ်တပ်မှအသိပညာရှင်၊ အတတ်ပညာရှင်များ၊ လူမှုအဖွဲ့အစည်းမှသြဇာကြီးမားတဲ့အသိပညာရှင်၊ အတတ်ပညာရှင်များ စတဲ့အရေးပါတဲ့အထင်ကရပုဂ္ဂိုလ်တွေ လက်တွေ့ကျကျ သဘောထားကြီးစွာ ပြုပြင်ပြောင်းလဲရေး အတွက် အဖက်ဖက်မှ တာဝန်ယူကြရမှာဖြစ်တယ်။ ကျွန်ုပ်တို့တိုင်းပြည်တွင် ကျန်းမာရေးနှင့်အတတ်ပညာ တိုးတက်ထွန်း ကားရေးအတွက် အဖက်ဖက်မှ လက်တွေ့တွင် ပြဿနာများစွာ ရင်ဆိုင်နေကြရတယ်။ ဒါကြောင့် ပြည်ပမှ အသိပညာ၊ အတတ်ပညာရှင်များ၊ အန်ဂျီအိုများက ဝင်ရောက်တာဝန်ယူပေးနေရခြင်းဖြစ်တယ်၊
ကျွန်ုပ်တို့လက်တွေ့တွင် လူမျိုးကြီး၊ လူမျိုးငယ် စတဲ့အနှိုင်ယူမှုတွေဟာ လူ့အခွင့်အရေးသဘောတရားအရ လက်တွေ့ ဖောက်ပြန်ကျူးလွန်နေခြင်းကြောင့် ကမ္ဘာ့အဖွဲ့အစည်း၏ဦးသျှောင် ကုလသမဂ္ဂက တိုက်ရိုက်ဆန့်ကျင်ပြီး လက်တွေ့တွင် လည်း မြန်မာပြည်တွင် တတ်နိုင်သမျှ အကာအကွယ်ပေးနေခြင်းဖြစ်တယ်။ နအဖစစ်အာဏာရှင်က “တိုင်းပြည်ပြိုကွဲရေးကို အကာအကွယ်ပြုဖို့ စစ်တပ်က ဆက်လက်တာဝန်ယူနေခြင်း” ဆိုတဲ့အကြောင်းပြချက်ဟာ ယုတ္တိမရှိချေ။ ဘာကြောင့်လဲ ဆိုတော့ တိုင်းရင်းသားများဟာ အမျိုးသားကိုယ်ပိုင်ပြဌာန်းခွင့်(နိုင်ငံရေးအာဏာ အတော်အတန်သုံးစွဲခွင့်)ရရှိရေးနှင့် မိမိတို့အမျိုးဘာသာသာသနာအတွက် အကာအကွယ်ပြုဖို့ တရားမျှတစွာ တိုက်ပွဲဝင်နေကြခြင်းဖြစ်တယ်။ မြန်မာပြည်တွင် အခြေခံကျတဲ့နိုင်ငံရေးစနစ် ပြုပြင်ပြောင်းလဲဖို့ ယနေ့လက်ရှိ နိုင်ငံရေးခေါင်းဆောင်များနှင့် တိုင်းရင်းသားလက်နက်ကိုင် ခေါင်းဆောင်များပြဿနာတွေကို ပူးတွဲဖြေရှင်းခြင်းဟာ အဓိကသော့ချက်ဖြစ်တယ်။ ယနေ့အခြေအနေတွင် ပြည်တွင်း စစ်အပြီးသတ်နိုင်လျှင် စစ်မှန်တဲ့နိုင်ငံရေးအဆောက်အအုံ တည်ဆောက်နိုင်မည်။ လက်တွေ့တွင် မြန်မာပြည်တွင် အမျိုးသားရေး ဆိုလျှင် ဗမာ့အမျိုးသားကိုသာ ကိုယ်စားမပြုပဲ ပြည်ထောင်စုတွင် အသက်ရှင်နေထိုင်သူမှန်သမျှ အကျုံးဝင်သည်။ ထို့ကြောင့် အမျိုးသားရေးကိစ္စတွင် ပါဝင်ဦးဆောင်ခွင့်၊ ပါဝင်လှုပ်ရှားခွင့်၊ ပါဝင်ပူးပေါင်းဆောင်ရွက်ခွင့်၊ ပါဝင်အဆုံးအဖြတ်ပေးခွင့် စတဲ့အခြေခံပြုပြင်ပြောင်းလဲမှုတွေ အရေးပါတယ်။ ဒီအခြေခံပြုပြင်ပြောင်းလဲမှုတွေ မျက်ကန်းပြု လျှင် ဒီအောက်တန်းကျတဲ့နိုင်ငံရေးအဆောက်အအုံတွေ ဆက်လက်အသက်ရှင်နေမှာ ဖြစ်တယ်။ မြန်မာပြည်တွင် လူဦးရေ သန်းပေါင်း(၅၀)ကျော်လာပြီးနောက် အခြေခံစီးပွားရေး၊ အခြေခံပညာရေးနှင့် အခြေခံပြည်သူ့ကျန်းမာရေးနှင့် အသက်အိုး အိမ်စည်းစိမ်များ အကာအကွယ်ပြုရေးအတွက် နိုင်ငံရေးလွတ်လပ်ခွင့်၊ စီးပွားရေးကင်းလွတ်ခွင့်၊ ယဉ်ကျေးမှုသီးခြား လွတ်လပ်ခွင့် စတဲ့အခြေခံလွတ်လပ်ခွင့်တွေ ဆိတ်သုဉ်းနေလျှင် အမျိုးသားရေးအကျိုးစီးပွား ဆက်လက် ကင်းမဲ့နေခြင်း ဖြစ်တယ်။ ယနေ့ လက်တွေ့ကျကျ အမှန်အတိုင်းထောက်ပြရလျှင် စစ်တပ်နှင့်စီးပွားပိုင်ရှင်သားသမီးများက နိုင်ငံခြားတွင် ပညာတော်သင်ခြင်း၊ ပြည်တွင်းတွင် စီးပွားရေးဇုံ သိမ်းပိုက်ထားခြင်းနှင့် ဈေးကွက်မှန်သမျှတွင် သူတို့အပေါင်းအပါများ ထိမ်းချုပ်ထားခြင်းကြောင့် လူဦးရေ သန်းပေါင်းများစွာတွင် တိုင်းရေးပြည်ရေးကိစ္စတွင် ပိတ်ပင်ကန့်သတ်ခံထားရသည်။ သာဓကပြရလျှင် စစ်တပ်နှင့်နီးစပ်ပြီး အထာသိတဲ့ဦးတေဇက ပုတ်လေကြောင်းနှင့် ဟိုတယ်ခရီးသွားလာရေးလုပ်ငန်းတွင် အမြတ်ကြီးကြီးနှင့် ခေတ်သစ်သူဌေး ဖြစ်လာတယ်။
ဒီမိုကရေစီစနစ် ထူထောင်ရာတွင် နိုင်ငံသားတို့၏နိုင်ငံရေးအသိတရားနှင့်အစိုးရနှင့်တိုင်းရေးပြည်ရေးတဝင် တရားမျှတစွာ အကန့်အသတ် လျော့နည်းစွာ တိုက်ရိုက်ပါဝင်ဆွေးနွေးတိုင်ပင်ခွင့်၊ အမြင်ဖလှယ်ခွင့်၊ အမှားအမှန် ဝေဖန်ခွင့်များကို တရားဥပဒေအတွင်း အကာအကွယ်ပြုပေးရန် အရေးကြီးသည်။ သို့မှသာ လာဘ်စားမှုတွေ၊ တရားဥပဒေလက်ချောမှုတွေ၊ အကျင့်စာရိတ္တ ဖောက်ဖျက်မှုတွေ လျော့နည်းလာမည်ဖြစ်တယ်။ ဤကိစ္စမှန်သမျှတွေကို လက်တွေ့ကျကျ အကောင် အထည်ဖော်ရေးအတွက် မြန်မာပြည်တဝိုက်တွင် အခြေခံနိုင်ငံရေးအဆောက်အအုံ ပြုရမည်။
ကျွန်ုပ်တို့မြန်မာပြည်သားတွေဟာ အသိညာဏ်ကောင်းမွန်ကြပြီး တိုင်းရေးပြည်ရေးတွင် တချိန်က စံနမူနာ ဖြစ်လာခဲ့တယ်။ ကမ္ဘာ့လူ့အသိုင်းအဝိုင်းတွင် နေရာယူဦးဆောင်လာခဲ့တယ်။ ဗြိတိသျှခေတ်တွင် အတိုးတက်ဆုံးနိုင်ငံအဖြစ် ဂုဏ်ယူလာခဲ့ တယ်။ သို့သော် ကျွန်ုပ်တို့ခေတ်တွင် နိုင်ငံရေးအဆောက်အအုံ ညံ့ဖျင်းမှု၊ အောက်တန်းကျမှုနှင့် မပြုပြင်နိုင်တဲ့အတွက် လမ်းဘေးတွင် မီးမလင်းပဲ ဆေးရုံတွင် ဆေးမရှိ၊ ကျောင်းတွင် ကျောက်သင်ပုန်း မရှိ၊ ရထားဘူတာတွင် အိမ်သာမရှိ၊ ကားဂိတ်တွင် သောက်ရေမရှိ၊ ဘုရားကျောင်းတွင် ဖိနပ်ထားရန် မလုံခြုံ စတဲ့ယိုယွင်းပျက်စီးမှုတွေဟာ တနေ့ထက်တနေ့ ကြီးမားလာတာ တွေ့ရတယ်။ ကျွန်ုပ်တို့ရပ်ရွာမြို့ပြတွင် သာရေးနာရေးကိစ္စမှအပ တခြားရပ်ရေးရွာရေးတွင် (ကြံ့ဖွံ့) အသင်း၊ မီးသတ်အဖွဲ့၊ မိခင်နှင့်ကလေးအသင်း၊ စွမ်းအားရှင်အသင်း စတဲ့အသင်းတွေဟာ တိုင်းသူပြည်သား ရွာသားတွေကို ကိုယ်စားပြုတာမဟုတ်ပဲ အတင်းအကြပ် အာဏာယူပြီး လူမှုရေးတွင် ဝင်ရောက်စွက်ဖက်တာဟာ အောက်တန်းကျတဲ့ နိုင်ငံရေးစနစ်ကြောင့် ဖြစ်တယ်။ ခရီးသွားလာရေးတွင် ရွာဦးဘုရားကို ကန်တော့ဆုတောင်းပြီးမှ ခရီးထွက်ရတဲ့ဓလေ့ဟာ တိုင်းသူပြည်သားတွေ ဘယ်လောက်အကြောက်တရား ဝင်နေပြီးဆိုတာ ကောက်ချက်ချလို့ရတယ်။ ကားလမ်းတွေပေါ်မှာ ကင်းစောင့်တပ်၊ လုံခြုံရေးတပ် စတဲ့ရဲတပ်တွေက မလုံခြုံတဲ့တိုင်းပြည်မှာ ကျွန်ုပ်တို့အသက်ရှင်နေကြရတယ်။ ဒီအခြေ အနေကျတဲ့အဆောက်အအုံတွေ ပြုပြင်ဖို့ စစ်အစိုးရမှာ တာဝန်ရှိတယ်။ အပစ်အခတ်ရပ်စဲရေးဟာ တိုင်းပြည်အေးချမ်း ရေးအတွက် အထောက်အကူပြုတယ်။ သို့သော် စည်းကမ်းမရှိတဲ့စစ်တပ်မှ ဖောက်ဖျက်မှုတွေ၊ မုဒိမ်းကျင့်မှုတွေ၊ တိုင်းသူပြည်သားတွေအပေါ် တရားမဲ့အကောက်ခွန်ယူမှုတွေ၊ လယ်မြေသိမ်းဆည်းမှုတွေဟာ နိုင်ငံရေးရင့်ကျက်ဖို့ အဟန့်အတားဖြစ်စေတယ်။ ယနေ့လက်တွေ့တွင် တိုင်းပြည်အရပ်ရပ်တွင် စစ်တပ်စခန်း ဖြန့်ကျက်ထားမှုလဲ မလိုအပ်တဲ့စစ်မက်မှု၊ သွေးထွက်သံယိုမှုတွေ ပေါ်လာမယ်ဖြစ်တယ်။ တခြားတစ်ဖက်တွင်လည်း စစ်တပ်က အကျွေးအမွေး ပြုရတဲ့တာဝန်ကြီးလာတယ်။ ဒါကြောင့် ကျွန်ုပ်တို့လက်တွေ့တွင် တွေ့ကြုံနေရတဲ့အောက်တန်းကျတဲ့ နိုင်ငံရေးအဆောက် အအုံပြုပြင်ပြောင်းလဲရန် ကြီးမားတဲ့တာဝန်ရှိတယ်။
တိုင်းပြည်မပြိုကွဲရေးဟာ အမျိုးသားအကျိုးစီးပွားက ဘယ်လောက်အထောက်အပံ့ပြုသလဲ?။ တိုင်းရင်းသားအခွင့်အရေး တွေကို ပိတ်ပင်ပြီး တမျိုးသားရေးကို အော်ဟစ်တာဟာ ပိုပြီးယုတ်မာတဲ့နိုင်ငံရေးအတွေးအခေါ်ဖြစ်တယ်။ ဒီယုတ်မာ တဲ့နိုင်ငံရေးအတွေးအခေါ်တွေကို မသတ်ဖြတ်၊ မချေမှုန်းလျှင် ကျွန်ုပ်တို့တတွေ အောက်တန်းကျတဲ့တိုင်းပြည်မှာ ဆက် လက်အသက်ရှင်ရနေရမှာဖြစ်တယ်။ ဒါကြောင့် အမျိုးသားရေးအကျိုးစီးပွားအတွက် မှားယွင်းနေတဲ့နိုင်ငံရေးအတွေးအခေါ်၊ အနိုင်ယူတဲ့နိုင်ငံရေးစနစ်၊ တရားမမျှတတဲ့အစိုးရယန္တရားအဆောက်အအုံတည်ဆောက်မှု စတဲ့အခြေခံပြုပြင်ပြောင်းလဲမှုတွေ စတင်ဖော်ဆောင်ရမယ်။ လက်တွေ့ကျကျ အဖက်ဖက်က မျှတတဲ့အပေးအယူနှင့်တန်ဖိုးရှိတဲ့အသိအမြင်တွေ ကိုင်ဆောင် ရမယ်။
တိုင်းရင်းသားနှင့်နိုင်ငံသားတွေရဲ့အခြေခံအခွင့်အရေးတွေ ပိတ်ပင်ခြင်း၊ လွှဲချော်တဲ့နိုင်ငံရေးစနစ်ကို ပြုပြင်ရန် လွန်ဆန်ခြင်း၊ တရားမမျှတတဲ့နိုင်ငံရေးအဆောက်အအုံတွေကို စနစ်တကျ ပြင်ဆင်ရန် ဝန်မခံခြင်း စတဲ့နိုင်ငံရေးအကြောက်တရားတွေဟာ အမျိုးသားအကျိုးစီးပွားတွေကို နစ်နာစေတယ်။ “ပြည်သူ့စွမ်းအားရှင်”ဆိုတဲ့အမည်နာမဂုဏ်ပုဒ်တပ်ပြီး ကျောင်းသား ပြည်သူ၊ ရဟန်းရှင်လူတွေကို ရိုက်နှက်ခြင်း၊ အကြံအဖန် မသွေမရာ၊ မဖွေမရာ နှုတ်လွှင့်ပြောဆိုကြိမ်းမောင်းခြင်း၊ ရုပ်မြင် သံကြားပေါ်တွင် ကမ္ဘာသိအောင် အပစ်မဲ့အရပ်သားတွေကို ကြိမ်းမောင်းထိုးကြိတ်ခြင်း စတဲ့အောက်တန်းကျတဲ့စွမ်းအား ရှင်တွေရဲ့အပြုအမူတွေ (အရပ်သားစကားအရ - စောက်ကျင့်တွေဟာ မြင်မကောင်းကြားမသာတဲ့ဖြစ်ရပ်တွေဖြစ်တယ်။ အမှန်စင်စစ် မြန်မာပြည်မှာ စွမ်းအားရှင် ကျဆုံးပြီးစီးနေခဲ့တယ်။ တက္ကသိုလ်ပညာကအစ နိမ့်ကျနေတဲ့ခေတ်တွင် အစွမ်းအစရှိတဲ့လူငယ်တွေ ပြည်ပထွက်ပြီး တိုးတက်ထွန်းကားရေးအတွက် ကြိုးစားလာခဲ့ကြတယ်။ ဒီနိမ့်ကျနေတဲ့ပြည်သူ စိတ်ဓါတ်တွေ၊ ယုတ်နိမ့်တဲ့အမြင်ကျဉ်းတဲ့စွမ်းအားရှင်အုပ်စုတွေနှင့် ကပ်ဖားစားတဲ့စီးပွားရေးအုပ်စုတွေဟာ အမျိုးသား အကျိုးစီးပွားကို နားလည်လျှင် ဒီလုပ်ရပ်တွေ ရပ်စဲသင့်ပြီး။ ဒါကြောင့် အမျိုးသားအကျိုးစီးပွားနှင့် တိုင်းရေးပြည်ရေး အဆင့်အတန်းမှီရေးအတွက် တာဝန်သိသိ၊ တာဝန်ရှိရှိ အသိအမြင် မြင့်မြတ်စွာ ဆင်ခြင်ပြီး အကျိုးတူပူးပေါင်းဆောင်ရွက်ရန် အထူးပင် လိုအပ်သည်။ မြန်မာပြည်၏နိုင်ငံရေးအသွင်းကူးပြောင်းရေးကို လေ့လာသော် (ပထမပိုင်း) ပြီး၏။ | 
No comments:
Post a Comment