ကိုလိုနီစနစ်ဖျက်သိမ်းရေး ဘင်္ဂလာဒေခ်ျ့တွင် တောင်းဆို
ထွန်းထွန်း
-----------
http://www.narinjara.com/detailsbur.asp?id=3692
၂၂၇-ခုနှစ်မြောက် ရခိုင့်အချုပ်အချာ အာဏာကျဆုံးသည့်နေ့တွင် ဗမာ အစိုးရမှ ရခိုင်ပြည်တွင် ကျင့်သုံးနေသော ကိုလိုနီ စနစ်ကို အပြီးတိုိင် ဖျက်သိမ်းရန် ကော့စ်ဘဇားမြို့တွင် တောင်းဆို ခဲ့ကြသည်။
အဆိုပါ တောင်းဆိုမူအား ဒီဇင်္ဘာလ ၃၁ ရက်နေ့တွင် ကျရောက်သော ၂၂၇ နှစ်မြောက် ရခိုင့်အချုပ်အချာ အာဏာကျဆုံးနေ့တွင် ကော့စ်ဘာဇားမြို့ တောကျောင်းမှ Press Club ရှေ့သို့ ချီတက်ခဲ့သော ဆန္ဒပြပွဲ အတွင်း တောင်းဆိုခဲ့ကြခြင်း ဖြစ်သည်။
"အဓိကကျွန်တော်တို့ ဆန္ဒပြ တောင်းဆို ရတဲ့ရည်ရွယ်ချက်က ရခိုင်သားတွေ ကျွန်ဖြစ်နေတာ ၁၇၈၄-ခုနှစ်ကနေ၂၀၁၁ နှစ် ဒီဇင်ဘာ ၃၁ရက်နေ့ဆိုရင် နှစ်ပေါင်း ၂၂၇-နှစ်ရှိသွားပြီ ဖြစ်တယ်။ ၁၉၆၁ ခုနှစ်က ကိုလိုနီ စနစ်ဖျက်သိမ်းရေးကို ကုလသမဂ္ဂမှာ ပြဌာန်းခဲ့တယ်။ ဒါပေမယ့် ဗမာ အစိုးရ အဆက်ဆက်က ရခိုင်ကို လက်အောက်ခံ ကိုလိုနီ နယ်ပယ် တစ်ခုလို သဘောထားပြီး အုပ်ချုပ် နေတယ်။ အဲဒါကြောင့် decolonization ဆိုတဲ့ ခေါင်းစဉ်နဲ့ ဒီစနစ်ကို ဖျက်သိမ်းဖို့ တရားဝင် တောင်းဆို ရတာဖြစ်တယ်" ဟု ဆန္ဒပြပွဲကို ဦးဆောင် လုပ်ကိုင်သည့် Arakan Freedom Movement မှ ဥက္ကဌ ဦးဖိုးလှက နိရဉ္စရာ သို့ ပြောသည်။
ဗမာ အုပ်ချုပ်သူများက ရခိုင်ကို ကိုလိုစနစ်ဖြင့် အုပ်ချုပ်နေသည်ဟု မည်သည့် အချက်များကို အခြေခံပြီး ပြောပါသလဲဟု မေးမြန်းရာသူက ယခုလို ပြောသည်။
" ရခိုင်ပြည်သူတွေရဲ့ ဘ၀ဟာ ကုန်းကောက်စရာ မရှိအောင် ဆင်းရဲမွဲတည် နေတယ်။ ဗမာ စစ်တပ် တပ်ရင်း (၆၀) ခန့်ကို တပ်စွဲထားပြီး မြေခွန်၊ လယ်ခွန်တောင်မကဘူး လူခွန်အထိကိုတောင် ကောက်နေတယ်။ အင်္ဂလိပ်ခေတ်ထက် ဆိုးရွားတဲ့ အခြေအနေကို ရောက်နေတယ်။ ဒါ့ပြင် ရခိုင် ကထွက်တဲ့ ဂတ်စ်ကိုလဲ ရခိုင်တွေ သုံးခွင့် မရှိဘူး။ ပြောပိုင်ခွင့်လည်း မရဘူး။ ရခိုင်ပြည်သူတွေ ဆန္ဒမပါဘဲ တိုင်းတပါးသား တရုတ်ကို ရောင်းစားထားတယ်။ ပိုလျှံတဲ့ ဂတ်စ်တွေကိုလည်း ဗမာပြည်က စက်မူဇုံတွေမှာ သုံးမယ်ဆိုတော့ ရခိုင်ပြည်ကို ကိုလိုနီ လက်အောက်ခံ နိုင်ငံလို သဘောထားတယ်ဆိုတာ သိသာ ထင်ရှားနေပါတယ်" ဟု သူက ပြောသည်။
ဆန္ဒပြပွဲတွင် ပါဝင်သူ အမျိုးသမီး တစ်ဦးကလည်း သူဆန္ဒပြရာတွင် ပါဝင်ရကြောင်းကို ယခုလို ပြောသည်။
" ရခိုင်ပြည်မှာ ရခိုင်တွေ နေထိုင်လို့ မရအောင်ထိ အခက်အခဲတွေ အမျိုးမျိုးဖြစ်အောင် အုပ်ချုပ်တဲ့ အစိုးရက ဖန်တီးထားတယ်။ ဒါကြောင့် ရခိုင်ပြည်ထဲက ရခိုင်သားတွေဟာ နိုင်ငံတကာကို သွားပြီး အငှားခံနေရတယ်။ ခုဆိုပြည်ပမှာ ရခိုင်သားတွေ သိန်းနဲ့ ချီလို့ ရှိနေပြီ ဖြစ်တယ်။ ပြည်ထဲမှာ ရခိုင် လူငယ်တွေ မရှိတော့ဘူး။ နို့သောက်နဲ့ တုတ်ထောက်လောက်ပဲကျန်တော့တယ်။ ဒီလို လုပ်နေတာကို မကျေနပ်တဲ့ အတွက် လာရောက် ဆန္ဒပြရတာ ဖြစ်ပါတယ်" ဟုပြောသည်။
ဆန္ဒပြပွဲသို့ ရခိုင်အမျိုးသားကောင်စီ ( ANC) ၊ ရခိုင်အမျိုးသမီး အစည်းအရုံး (RWU) ၊ ရခိုင် ဒီမိုကရေစီ အဖွဲ့ချုပ် ပြည်ပ (ALD) မှ အဖွဲ့ဝင်များနှင့် ဘင်္ဂလားဒေ့ခ်ျနိုင်ငံမှ ရခိုင်ကျောင်းသားလူငယ်များ စုစုပေါင်း ၅၀ခန့် တက်ရောက်ခဲ့သည်။
အခမ်းအနားကို နံနက် ၁၁ နာရီမှ စတင်ခဲ့ပြီး ရဟန်းတော်များအား ဆွမ်းကျွေး ကုသိုလ် လုပ်ကာ နေ့လည်ပိုင်းတွင် ဆန္ဒပြ လှုပ်ရှားမှုကို ပြုလုပ်ပြီးနောက် တောကျောင်း၌ ရေစက်ချ၊ အမျှဝေပြီး ငါးပါးသီလခံယူကာ ညနေ ၃နာရီခန့်တွင် အောင်မြင်စွာပြီးစီးခဲ့သည်။
No comments:
Post a Comment