တိုင်းရင်းသားအသံ
ဝတပ်ဖွဲ့အား လက်နက်နှင့်ငြိမ်းချမ်းရေး လဲလှယ်ရန်၊ နအဖတပ်မှူး ကျောသပ်တိုက်တွန်း
User Rating: / 0
PoorBest
သတင်း - သျှမ်းသံတော်ဆင့်သတင်း
Monday, 29 September 2008 11:25
တြိဂံဒုတိုင်းမှူး ဗိုလ်မှူးချုပ် ဝေလင်းသည် ၂၀၀၈ နှစ်ကုန်၌ ၀တပ်ဖွဲ့အားလုံး လက်နက်နှင့်ငြိမ်းချမ်းရေးလဲလှယ်ရေး အတွက် ပြင်ဆင် ထားရန်နှင့် ထိုင်းနယ်စပ်တလျှောက် အခြေစိုက်ဝတပ်များ မြောက်ပိုင်းပန်ဆန်းဌာနချုပ်သို့ တပ်ဆုတ်ရန် ကျောသပ်ချော့မြူ တိုက် တွန်းခဲ့သည်ဟု နယ်စပ်သတင်းရပ်ကွက်က ဆိုပါသည်။
ယခုလ ၁၈ ရက် သျှမ်းပြည်အရှေ့ပိုင်း မိုင်းဆတ်မြို့နယ် ၀ပြည်သွေးစည်း ညီညွတ်ရေးတပ်မတော် ၀မ့်ဟုန့်စခန်း၌ ၁၇၁ စစ်ဒေသတပ်မှူး ဝေ့ရှော်ယင် (ဝေ့ရှော်ကန်း၏ညီ) နှင့်အခြား ၀ တပ်မှူးများအား ဗိုလ်မှူးချုပ်ဝေလင်း သွားရောက်တွေ့ဆုံစဉ် စည်းရုံး ပြောဆိုခြင်းဖြစ်သည် ဟုဆို၏။
“လက်နက်ချမယ် မချဘူးဆိုတာ တောင်ပိုင်းဝ တပ်ဖွဲ့ကဘဲ လုပ်လို့မရဘူး။ ပန်ဆန်းဌာနချုပ်ရဲ့ဆုံးဖြတ်ချက်ကို နားထောင်ရမယ်”- ပေါ့ထောက်ဆမ်ဟု ဒေသခံများခေါ်ဝေါ်ကြသည့် ဝေ့ရှော်ယင်က ပြန်ဖြေကြောင်း ၀အရာရှိတစ်ဦးနှင့်သိကျွမ်းသည့် မိုင်းဆတ် ကား သမားတစ်ဦးက ပြောပြသည်။
“လွန်ခဲ့တဲ့ အနှစ် ၂၀ လောက်က ခွန်ဆာ့ MTA တပ်ကိုထိုးစစ်ဆင်ဖို့ ကျနော်တို့ကို မြောက်ပိုင်းကနေခေါ်ဆင်းလာတယ်။ ကနေ့ အထိ ယွက်စစ်ရဲ SSA တပ်ကို တိုက်ခိုက်ဖို့ ကျနော်တို့ ဖိအားပေးခံနေရဆဲဖြစ်တယ်။ ကျနော်တို့တပ်ဖွဲ့ စားဝတ်နေရေးအတွက် ကျပ်သန်းထောင်ချီရင်းနှီးပြီး မွေးမြူရေး၊ စိုက်ပျိုးရေး လုပ်ငန်းတွေလုပ်ရတယ်။ ဒီအရင်း အနှီးတွေအတွက် ကျေနပ်တဲ့အထိ လျော် ကြေးမရရင် တစ်လက်မမှ တပ်မဆုတ်ဘူး” ဟု ၀တပ်ဖွဲ့က အစည်းအဝေးအပြီး နအဖတပ်မှူးတစ်ဦးအားပြန်ပြောကြောင်း အဆိုပါ ကားသမားက ပြန်လည်ပြောပြ၏။
ဝတပ်ဖွဲ့ ကျပ်သန်းထောင်ချီ ရင်းနှီးမြုပ်နှံခဲ့ရသော စိုက်ပျိုးရေးလုပ်ငန်းများမှာ နှင်းသီးခြံ၊ လိမ္မော်ခြံ၊ ကော်ဖီခြံ၊ လဖက်ခြံ၊ စပျစ်သီး ခြံအပြင် အများဆုံးကုန်ကျသော ရာဘာခြံနှင့် ကြက်၊ ၀က်မွေးမြူရေးတို့ဖြစ်ကြောင်း နယ်စပ်မှ ထိုင်းအာဏာပိုင်တစ်ဦးကဆို၏။
“နအဖအကြီးအကဲ ဗိုလ်ချုပ်မှူးကြီးသန်းရွှေကနေ အပစ်ရပ်အဖွဲ့တွေနဲ့အဆင်ပြေအောင်ဆက်ဆံပါ ပြဿနာမဖြစ်စေနဲ့ လို့တိုင်းမှူး ကိုမှာကြားတယ်။ စစ်အစိုးရအဖို့ ၂၀၁၀ ရွေးကောက်ပွဲမတိုင်မီ စစ်မျက်နှာ ၂ ဘက် တပြင်ထဲ မဖွင့်ချင်ဘူးလေ။ တဘက် တလမ်း ကလည်း ပြည်တွင်းပြည်ပ အတိုက်အခံတွေနဲ့အပစ်ရပ်အဖွဲ့တွေအကြား အလေးထားနေရလို့ဘဲ” ဟု စစ်ရေးကျွမ်းကျင်သူ နယ်စပ် ထိုင်းလုံခြုံရေးအရာရှိတစ်ဦး သုံးသပ်ပြောဆိုသည်။
၂၀၀၈ မေလ ဆန္ဒခံယူပွဲ နောက်ပိုင်း ၂၀၁၀ ရွေးကောက်ပွဲ အတွက်ပြင်ဆင်သည့်အနေဖြင့် အပစ်ရပ်များ အားလုံး လက်နက်ချရန် နည်းလမ်းအမျိုးမျိုး ဖိအားပေးလာခဲ့သည်။
ယခုလ ၁၈ ရက် နံနက် ၁၀ နာရီမှ မွန်းလွဲ ၂ နာရီအထိ ထိုအစည်းအဝေးသို့ တြိဂံဒုတိုင်းမှူးနှင့်အတူ မိုင်းဆတ်အခြေစိုက် စကခ ၁၄ စကခမှူး၊ မိုင်းတုံဗျူဟာမှူး၊ မိုင်းတုံအခြေစိုက် ခလရ ၁၁၃ တပ်ရင်းမှူးအပြင် ထိုင်းနယ်စပ် လွယ်လန်းဒေသ နအဖတပ်ရင်း ၆ ရင်းမှတပ်ရင်းမှူးများတက်ရောက် ကြ၏။
ဝတပ်ဖွဲ့ဘက်က ချင်းမိုင်ခရိုင် မျက်နှာချင်းဆိုင် မိုင်းယွမ်းဂွင် တပ်မဟာ ၂၅၁၈ ၊ ဟိုပန်၊ ဟိုယွက်ဂွင် တပ်မဟာ ၄၁၄ ၊ မိုင်းကျွက်၊ ဟွေ့အော့်၊ နောင်ဝဲန်း၊ နမ့်ဟူးခွန် စစ်ဒေသ ၁၇၁ နှင့် မယ့်ဟောင့်ဆွမ်ခရိုင်မျက်နှာချင်းဆိုင် တတ်လျက်၊ နမ့်ကတ်၊ ခိုင်းလုံ၊ ခန့်ပါ၊ တို့မှ အုပ်ချုပ်ရေး၊ စစ်ရေး အရာရှိအယောက် ၃၀-၄၀ ဖိုးဝှီးလ် ကား ၁၀ စီးကျော်ဖြင့် ၀မ့်ဟုန့်အစည်းအဝေးသို့ သွားရောက် ခဲ့ကြသည်။
No comments:
Post a Comment